Presidenti Meta vazhdon vizitën e tij në Shtetet e Bashkuara ndërsa kryeministri Rama me agjendën e tij ndodhet për një vizitë zyrtare në Abu Dhabi.
Në këtë mënyrë ata e kanë përligjur mospjesëmarrjen e tyre në ceremoninë mortore të këngëtares së madhe shqiptare, Nexhmije Pagarusha. Por në faqet e Facebookut kanë mbetur ngushëllimet që kanë bërë me këtë rast.
Tirana zyrtare është mjaftuar me ambasadorin e Shqipërisë në Kosovë, Qemail Minxhozi, i cili u shpreh se Pagarusha ishte bashkim i Kosovës dhe Shqipërisë. Në akademinë përkujtimore me këtë rast, ambasadori Minxhozi, tha se ikonat nuk vdesin asnjëherë, por vetëm lartësohen.
Kortezhi i këngëtares së mirënjohur, Nexhmije Pagarushës, është nisur për në fshatin e saj të lindjes, Pagarushë, prej Teatrit Kombëtar të Kosovës duke kaluar nëpër sheshet kryesore të Prishtinës. Ndërsa varrimi i saj u krye në orën 14:30.
Në ceremoninë ne organizuar me këtë rast kanë qenë pjesëmarrës mijëra qytetarë gjithashtu edhe kryeministri, Albin Kurti dhe kryeparlamentarja, Vjosa Osmani.
Pranë arkivolit të 86 vjeçares kanë qëndruar performues nga ansambli “Shota”.
