Firmat turke në Shqipëri janë duke u përballur me probleme. Kjo u bë me dije nga Mevlüt Çavuşoğlu, ministër i Jashtëm i Turqisë, gjatë konferencës për shtyp që zhvilloi në Tiranë me homologun Gent Cakaj.
Çavuşoğlu tha se ka diskutuar me Cakajn, por “do t’ia bëjë me dije këto probleme edhe kryeministrit Rama”.
Ministri turk theksoi se Ankaraja synon të forcojë edhe më tej bashkëpunimin ekonomik me Shqipërinë, edhe pse niveli aktual është i kënaqshëm.
Ditën e djeshme ishte Ambasada e SHBA-së në Tiranë që publikoi një deklaratë të ashpër duke ngritur shqetësimin mbi klimën e investimeve në vendin tonë. Reagimi i ambasadës lidhej me një hapësirë në aeroportin e Rinasit, e cila pretendohet nga një firmë amerikane, por që Gjykata Administrative nuk i dha të drejtë.
