Tirana është thyer pas 9 fitoreve radhazi, duke marrë një barazim me shumë vuajtje ndaj skuadrës së Skënderbeut mbrëmjen e së shtunës në stadiumin “Air Albania”.
Djemtë e trajnerit Emanuel Egbo nuk ia kanë dalë që të shënojnë fitoren e 10-ë të tyre, e për më tepër ishin në prag të mundjes nga skuadra e korçarëve.
Bardheblutë e kryeqytetit kanë zhvilluar sot ndeshjen e javës së 22-të të Kategorisë Superiore, por rezultati ishte zhgënjyes. Shanset dhe mundësitë për të shënuar ishin të shumta nga të dyja skuadrat, mirëpo nuk u shfrytëzuan ashtu siç duhej, duke e lënë rezultatin me barazimin 1-1.
Ishin korçarët ata që zhbllokuan rezultatin të parët me anë të golit të Dejvi Bregut në minutën e 33-të të lojës, duke e mbyllur pjesën e parë me fitoren e tyre.
Ky rezultat do të vazhdonte deri në minutën e 80-të, në një lojë deri diku të barabartë nga të dyja skuadrat. Më pas Elton Cale barazoi rezultatin, duke i ndihmuar bardheblutë që dukej se u shkundën nga ekipi i trajneri Ilir Daja.
Momentalisht kryeqytetasit janë në vend të parë me pikë të barabarta me skuadrone e Kukësit, mirëpo verilindorët kanë një ndeshje më pak, të cilën do e luajnë ditën e nesërme me ekipin e Bylisit, në një sfidë që nuk duket të jetë aspak e lehtë./Fjala.al/Katerina Tafa/
