Astrit Thaçi, 27-vjeçari tashmë i shpallur në kërkim nga Policia për plagosjen e Rexhep Terziut në Durrës, ngjarje kjo e ndodhur më 10 shkurt, dyshohet se është edhe grabitësi i argjendarisë sot në Elbasan. Ngjarja ndodhi mëngjesin e sotëm pranë Drejtorisë së Policisë në Elbasan. Burimet policore konfirmojnë se, bazuar tek të dhënat dhe idendikiti i krijuar pas këqyrjes së kamerave të sigurisë, rezulton se Thaçi, autori i dy vjedhjeve në Durrës, të jetë autori i grabitjes me armë zjarri të argjendarisë ‘Diamant’ e cila ndodhet 10-12 metra larg nga drejtoria e policisë Elbasan.
Astrit Thaçi i njohur ndryshe si “skifteri” i Durrësit është një nga personat më të kërkuar në vendin tonë pasi ai për pak desh i mori jetën një personi në Durrës në banesën e tij teksa hyri për ta grabitur. Edhe pse policia ende nuk ka një fakt konkret që e lidh me ngjarjen e sotme, të shumëkërkuarin nga Durrësi, mësohet se do të jetë ai personi i vetëm që do të gjurmohet dhe hetohet për atë grabitje.
Astrit Thaçi, më 10 shkurt u fut për të grabitur banesën e Rexhep Tereziut, në Durrës. Mirëpo, ai u pikas nga familjarët dhe gjatë përleshjes me të zotin e shtëpisë ai e plagosi me armë 42-vjeçarin në këmbë. Policia gjeti edhe makinën e autorit, 100 metra larg banesës së 42-vjeçarit dhe brenda së cilës kishte disa doza lënde narkotike. Po kështu 27-vjeçari dyshohet të jetë edhe autori i grabitjes së pikës së kredidhënies, ‘Kredo.al’, ngjarje kjo e ndodhur 4 ditë më parë në qytetin e Durrësit. 27-vjeçari i maskuar dhe me pistoletë lodër i mori punonjësit 1 mln lekë dhe u largua.
