Presidenti rus Vladimir Putin dhe homologu i tij francez Emmanuel Macron folën sërish me telefon të dielën. Mësohet se biseda zgjati një orë e 45 minuta, thotë presidenca franceze.
Mësohet se presidenti rus ka akuzuar “radikalët” ukrainas për një incident më 3 mars në termocentralin bërthamor Zaporizhzhia në Ukrainë.
Kremlini zyrtar ka thënë se Vladimir Putin i tha homologut të tij francez Emmanuel Macron se Ukraina ishte “përgjegjëse për provokimin” rreth termocentralit bërthamor Zaporizhzhia.
Sulmi rus në qytetin juglindor të Enerhodar dhe centralin e tij bërthamor në Zaporizhzhia (më i madhi në Evropë), i cili shkaktoi një zjarr, tërhoqi dënimin e menjëhershëm nga liderët botërorë, me ministrat e jashtëm të BE-së dhe NATO-s që po shqyrtojnë sanksione të reja.
Sipas mbikëqyrësit atomik të OKB-së, nuk u lëshua asnjë material radioaktiv.
