Kryeministri Edi Rama e ka cilësuar edhe si një sukses të tijin personal arritjen e mbledhjes së shumës së jashtëzakonshme prej 1.15 miliardë euro për rindërtimin e zonave të prekura nga tërmeti i 26 nëntorit.
Rama theksoi mbrëmjen e kësaj të marte, se ai përdori të gjitha lidhjet e tij të ndërtuara në vite ndërsa saktësoi se ai është i gatshëm të vishet edhe me lecka për Shqipërinë.
“Besoj se kjo që kemi arritur përtej shumë, është edhe një moment i bukur për Shqipërinë dhe imazhin e saj ndërkombëtarisht. Nuk është njësoj si të të besojnë dhe mos të të besojnë kur të financojnë”, u shpreh Rama në emisionin ‘Real Story’.
I pyetur se sa u investua ai personalisht për të arritur mbledhjen e fondeve për tërmetin, Rama u shpreh se “100 për qind në gjithçka, edhe në nivelin institucional, edhe në nivelin personal, por edhe përmes lidhjeve të ndërtuara në vite. Për Shqipërinë jam gati të vishem edhe me lecka. Të shtrij edhe dorën fizikisht dhe nuk kam asnjë problem në këtë aspekt.”
