Deputetja e PD Oriola Pampuri ëshë shprehur se pas përçarjes së kësaj partie, ajo është ndjerë e shantazhuar nga grupi i Rithemelimit. Pjesë e grupimit të Alibeajt, Pampuri tha se kjo parti duhet të afrojë figura të reja dhe jo të largojë ata që kanë kontribuar për të. Në emisionin Dekalog të gazetarit Roland Qafoku në RTSh 24, Pampuri tha se nuk guxon të hapë mesazhet dhe komentet në rrjetet e saj sociale, pasi ndaj saj dhe kolegeve të tjera përdoret një gjuhë fyese.
-Zonja Pampuri, a keni ndjerë ju qoftë drejtpërdrejt, apo indirekt shantazh apo presion nga grupi i Rithemelimit?
-Unë kam 7 muaj, që të jem e sinqertë nuk e besoj se demokratët, njerëzit marrin një lloj spuntoje. Në momentin që shikojnë një lloj respekti nga i pari, nuk marrin hapin që të shpifin, të ofendojnë, të shajnë, e për më shumë një zonjë e cila përfshihet në politikë duke vendosur fytyrën, profesionalizmin, dhe gjithçka tjetër. Në këto 7 muaj, unë personalisht dhe sigurisht edhe koleget e mia, por unë po flas për veten time nuk mundem të hap mesazhet, komentet, në rrjetet sociale të miat, nga sharjet dhe shpifjet nga më të rëndomtat.
Dikur gjyshi im ka qenë i internuar në Llakatund dhe më thoshte se në kohën e komunizmit të bënin të çmendur, të bënin imoral, të bënin pa integritet dhe kur i pari i Komitetit Qendror e hidhte këtë shashkë, dhe sigurisht e rëndonin më shumë situatën. Më është dukur vetja si pjesë e atyre historive që më tregonte gjyshi im. Kur kam marrë fjalën këtë herë në mbledhjen e grupit parlamentar kam thënë se ne kemi 30 vjet brez pas brezi që i japim votën kësaj partie. Para 30 vitesh, të parët e mi kanë qenë anti-komunistë. Dhe sot të trajtohesh kulak në partinë tënde, kur ti e kishe idhull atë parti… Të thonë se sa të vijmë ne, ti do largohesh nga kjo parti… Ata duhet të thonë faleminderit për kontributin, dhe të afrojnë edhe të tjerë që kanë integritet moral dhe profesional.
