Flasin fqinjët e 26-vjeçarit Martin Çeco, i cili u mbyt me litar nga tre persona dhe më pas u hodh në rezervuarin e Maliqit.
Një prej tyre është shprehur se viktima ka qenë një person shumë pozitiv dhe i qetë, ndërsa për familjen e tij theksojnë se nuk janë aspak problematik por punëtor.
“Djalë shumë i mirë, ne po bëjmë vite afër kësaj familje jemi komshinj, ata shikonin punën e tyre. Ne jemi habitur s’po marrim dot veten, i ati se ka kuptuar akoma është në gjendje shumë të rëndë, edhe i vëllai donte të mbytej mbrëmë”, tha fqinjja e familjes Çeço.
Më tej ajo ka bërë me dije se i ati i të ndjerit ndodhet në gjendje të rëndë shëndetësore dhe është transportuar në spital pasi mori vesh lajmin e kobshëm.
“E kemi shpënë në spital të atin, është shumë keq. Motra e ka denoncuar rastin në polici. Djali nuk prekte një mizë, nuk ishte problematik, at e bir punonin, janë në kushte skandaloze por punonin dhe jetonin me krahët e tyre”, rrëfeu ajo në vijim.
Një tjetër fqinje e familjes së viktimës nënvizon po ashtu se Martini ishte një person që nuk shqetësonte askënd dhe se janë habitur kur kanë marrë vesh lajmin.
“Ne jemi komshinj, djali nuk ngatërroheshe me njeri, na ka ardhur shumë keq, kur e morëm vesh që si u mbyt na u drodh mishi, si ka mundësi ai, as nuk ngacmonte as nuk trazonte njeri. Neve kur morëm vesh për lidhje u çuditëm ai nuk ju fliste as vajzave të fshatit jo të lidheshe. Thonë që vajza ishte nga Goskova, të tjerët thonë është nga Marjani i Oparit. As autorët nuk i njohim ai nuk ngatërrohej as me shokët. Me të atin shkonte shumë, motrat i ka të martuara, vëllai punon në Maqedoni. Kur u shpall i humbur e kërkonte i ati pastaj nga policia e morëm vesh që e gjetën të mbytur”, tha fqinja.
