Kryeministri në largim Ramush Haradinaj është treguar i ashpër teksa i ka bërë thirrje Vetëvendosjes dhe Lidhjes Demokratike të Kosovës që të mos heqin taksën ndaj Serbisë.
Në të kundërt, sipas tij, Beogradi do ta vrasë për së dyti Kosovën.
Sipas Haradinajt, pas deklaratave të zyrtarëve shtetërorë serbë për mohimin e gjenocidit në Kosovë, heqja e taksës nuk duhet të ndodhë në asnjë mënyrë.
“Për taksën ka ndryshuar gjendja. VV dhe LDK do ta kenë edhe më zor me heq, pas mohimit të krimeve serbe nga ana e Vuçiçit, nga Gjuriçi, Vulini, Daçiçi. Nuk e kuptoj se si mundet LDK-ja dhe VV-ja me heq taksën dhe me rikthye pushtimin ekonomik të Serbisë në Kosovë.
Të cilës Serbi? Ajo që të ka vrarë dhe tash e mohon edhe krimin. Po të vret për së dyti. I bëj apel LDK-së dhe VV-së që mos të gabojnë me heq taksën, se bëjnë gabim të madh dhe tragjik dhe politik. Sepse tani do të mbesin duar thatë se nuk kanë çka të japin më në këmbim të njohjes dhe do të na kushton shtrenjtë”, ka thënë ai për Ekonomia Online.
Një vendim tjetër që Haradinaj e konsideron të paprekshëm është edhe ai për ndërtimin e autostradës së Dukagjinit, për të cilën VV-ja dhe LDK-ja janë shprehur kundër dhe të cilat kanë deklaruar se sapo të vijnë në pushtet do të rishohin buxhetin që është dhënë për këtë projekt.
Haradinaj paralajmëron VV-në e LDK-në: Taksa dhe autostrada e Dukagjinit – të paprekura from Ekonomia Online on Vimeo.
