Gazetari i njohur italian Roberto Saviano ka publikuar një video të veçantë në rrjetin e tij social, Facebook.
Në këtë video shihet sesi një burrë ndihmon një këlysh të vogël sloth ose siç njihen ndryshe përtaci i pyllit, të bashkohet sërish me nënën e tij. Ai ra nga pema teksa po ngjiteshin së bashku dhe reagimi i nënës kur bashkohet sërish me të voglin e saj është shumë domethënës.
Këtë gjë e vlerëson shumë edhe Saviano, i cili e ka publikuar këtë video edhe për të nxjerrë mesazhin se njerëzit duhet t’i ndihmojnë sa më shumë kafshët, per t’ua bërë edhe atyre jetën e egër më të lehtë.
“I vogli i një përtaci bie nga supet e nënës ndërsa ajo po ngjitej në një trung. Përtacët janë kafshë të ngadalta, shumë të ngadalta dhe distanca e tyre do të donte shumë orë për t’u plotësuar. Por në vendin e duhur ishte një burrë dashamirës që ka ndihmuar kafshët në fjalë. Ai mori këlyshin, u kujdes për të, e me durim dhe butësi e solli përsëri në krahët e nënës së saj. Kur pashë shikimet mes të dyve, m’u duk se isha dëshmitar i diçkaje të madhe, sikur dikush që mendon se është i humbur përgjithmonë, e gjen veten papritur dhe e mban aq fort sa nuk rrezikon të humbasë më kurrë veten. Mbrojtja, e vërteta, e ndërtuar në ngadalësi… Ky është ritmi i besimit, i një vështrimi të mprehtë.”, shkruan Saviano.
