Presidenti Ilir Meta ka depozituar në Prokurorinë e Posaçme SPAK kallëzimin penal ndaj ministres së Drejtësisë, Etilda Gjonaj. Meta e akuzon ministren se është bërë pjesë e asaj që e quan “grusht shteti” në përpjekjen e mazhorancës për të kontrolluar Gjykatën Kushtetuese.
Përveç Gjonajt, në SPAK u kallëzuan nga kreu i shtetit edhe dy drejtues të lartë të Ministrisë së Drejtësisë.
Meta foli për një “celulë mafioze në krye të Ministrisë së Drejtësisë”, e cila, sipas tij, nëpërmjet falsifikimeve ka tentuar një grusht shteti duke rrëmbyer haptazi, në mënyrë mafioze, një kompetencë që Kushtetuta ia jep vetëm Presidentit të Republikës.
Meta ftoi edhe njëherë tjetër qytetarët që t’i bashkohen protestës së 2 marsit të thirrur prej tij.
“Më 2 mars të gjithë shqiptarët në bulevard për të bërë të qartë se shqiptarët janë me Kushtetutën dhe jo për presidentin Meta”, tha ai.
Presidenti tha se prova të tjera do të publikohen në ditët në vijim dhe që do të synojnë “shpartallimin e grushtit të shtetit”.
