Ministrja e Shëndetësisë Ogerta Manastirliu foli për masat që po ndjek Shqipëria për parandalimin e koronavirusit.
“Deri tani nuk kemi asnjë rast të konfirmuar me koronavirus. Janë testuar 8 raste tek laboratori i ISHP-së, një laborator i certifikuar. Këto 8 raste janë identifikuar pasi kishin lidhje me udhëtimet në Kinë. Rastet janë ndjekur në vazhdim dhe pas testimeve kanë rezultuar negative”- tha ministrja e Shëndetësisë.
Manastirliu tha se Shqipëria po bën kontroll të kufijve 24 orë në 7 ditë të javës.
“Çdo vendim që do e marrim bashkë me TaskForcën në raport me udhëzimet e Organizatës Botërore të Shëndetësisë. Ne jemi transparent. Nuk ka vend për të krijuar panik tek qytetarët. E kemi vendosur për vendin e karantinës. Ai mund të jetë strukturë spitalore ose jo. Çdo gjë do vijë me kohën”- u shpreh Manastirliu në emisionin në “Open”.
