Një djalë 19 vjeç është arrestuar, pasi është identifikuar si një nga tifozët që gjatë ndeshjes Kukësi-Tirana ka thyer stolat e stadiumit “Air Albania”.
Ky lajm është bërë publik nga vetë Policia e Shtetit përmes një postimi në faqen zyrtare, ku bën me dije se 19-vjeçari me inicialet F.Z., ka rënë në pranga.
I riu ndodhet në komisariat, ndërsa bëhet me dije se janë duke u kërkuar dëmtuesit e tjerë të stolave të stadiumit.
Mbi këtë shtetas rëndojnë akuzat për veprat penale të “Shkatërrimi i pronës” dhe “Prishja e qetësisë publike”./Fjala.al/
Njoftimi i policisë:
Kapet një tjetër person, për shkatërrim të pronës dhe prishje të qetësisë publike.
Shkatërroi stolat e stadiumit “Air Albania” dhe hodhi sende të forta në fushë gjatë ndeshjes Tirana-Kukësi, vihet në pranga 19-vjeçari.
Nga Specialistët për Hetimin e Krimit në Komisariatin e Policisë Nr. 1 Tiranë është bërë i mundur identifikimi, kapja dhe arrestimi në kushtet e flagrancës, për veprat penale “Shkatërrimi i pronës” dhe “Prishja e qetësisë publike”, i shtetasit:
Z., 19 vjeç, banues në Tiranë.
Nga tërësia e veprimeve procedurale të kryera nga ana e Policisë ka rezultuar se gjatë zhvillimit të ndeshjes Tirana – Kukësi, ky shtetas ka thyer stolat e stadiumit dhe ka hedhur sende të forta në fushën e stadiumit “Air Albania”, Tiranë.
Vijon puna për kapjen e personave të shpallur në kërkim dhe identifikimin e personave të tjerë të përfshirë në këto veprime të kundërligjshme.
Materialet procedurale i kaluan Prokurorisë së Rrethit Gjyqësor Tiranë, për veprat penale “Shkatërrimi pronës” dhe “Prishja e qetësisë publike”.
