Kryefjala e mediave sportive për ditën e sotme është fitorja e Manchester United në Premier League, dhe humbja e Romës në Seria A. Ekipi i Ten Hag shkëlqeu në ditën e djeshme duke mundur Arsenalin optimist me rezultatin 3-1, ku golashënuesit ishin: Rashford me dy gola, Antony me gol në debutim, dhe Saka nga ekipi londinez.
Në Seria A, Roma dështon në transfert duke pësuar një humbje të thellë ndaj Udinezes me rezultat 4-0.
Ndjekim disa titujt kryesorë të gazetave sportive:
Në Britaninë e Madhe, Daily Express Sport hapet me yllin debutues të ‘djajve’ duke shkruar: “Antony dhe tërbimi”. Braziliani arriti të shënonte një gol mjaft të bukur në ndeshjen e tij të pare për United.
Gazzetta dello Sport hapet me intervistën e fundit të presidentit të kuqezinjve, Cardinale: “Milan në gjithë botën”. “Kemi një vizion dhe një objektiv të qartë: ekipin në krye të Evropës dhe botës”. Dhe Pioli mbetet në krye”- u shpreh kreu i RedBird Capital dhe numri 1 i kuqezinjve.
“Mou, çfarë shuplakash” shkruan Corriere dello Sport. Roma e panjohur: gabime dhe shpërqendrime, Udinese fiton 4-0. Mourinho i frustruar por dhe motivues: “Më mirë të humbasësh një ndeshje si kjo sesa katër ndeshje me 1-0”.
Tuttosport hapet me bardhezinjtë: “Juve ngre ritmin”. Nesër Allegri duhet të reagojë ndaj një sfide të vështirë siç është ajo me PSG.
“La Vuelta bëhet e kuqe” është titulli i madrilenes AS. Thymen Arensman fiton fazën 15 të çiklizmit të La Vuelta-s ndërsa Remco Evenepoel lufton për të mbajtur epërsinë.
Katalanasja Mundo Deportivo hapet me titullin “Vdekjeprurës”. Lewandowski, me pesë gola në katër ndeshje të ligës, tashmë bën diferencën për Barçën.
Në Spanjë, Marca hapet me rekordin e mundshëm për mesfushorin: “Champions e vendos atë në 100”. Modric do të luajë në Glasgow ndeshjen e tij të 100-të me Realin në Champions dhe fillon ëndrrën e 6 trofeve të Champions League që do të barazonin Paco Gento.
“Zoti Gol” është titulli i Sport e cila gjithashtu fokusohet tek bomberi polak. Lewandowski, 9-ta që i duhej Barçës. Lojtari ka pesë gola në 12 goditje.
“Çfarë zgjimi” ka shkruar gazeta romake “Il Romanista”. Udinese turpëron Romën dhe i bën që të jenë me këmbë në tokë.
Në Francë, megjithatë, gjithçka është e lehtë për Paris Saint-Germain, kundërshtarin e radhës të Juventusit në Champions League. “Parisi i qetë”, shkruan L’Equipe në faqen e parë.