Anëtari i Këshillit të Lartë të Prokurorisë, Besnik Cani është shkarkuar sot nga detyra. Vendimi u mor nga Komisioni i Posaçëm i Apelimit për shkak se prokurori nuk ka bërë deklarim të saktë të pasurisë.
Besnik Cani u konfirmua në detyrë nga Komisioni i Pavarur i Kualifikimit më 27 nëntor 2018 dhe dy javë më pas, Cani u zgjodh anëtar i Këshillit të Lartë të Prokurorisë megjithëse kishte probleme me pasurinë. Por vendimi i KPK-së për Besnik Canin u ankimua nga Operacioni Ndërkombëtar i Monitorimit (ONM) dhe pas tyre edhe nga Komisioneri Publik, të cilët kritikuan vendimin e konfirmimit në detyrë të tij, pavarësisht problemeve të shumta me pasurinë, aftësitë profesionale dhe shkeljen e etikës.
Sipas Komisionerit Publik, vendimi i Komisionit të Pavarur të Kualifikimit ishte “kontradiktor dhe jo-bindës” dhe se ishte marrë në interpretim të gabuar të ligjit.
Mirëpo të dhënat në lidhje me pasurinë e tij tregojnë se prokurori Besnik Cani zotëronte pasuri me vlerë 900 mijë lekë në vitin 2003. Sipas deklaratës së tij të parë, prokurori zotëronte një shtëpi private banimi prej 100 m2, e deklaruar në vlerën e 700 mijë lekëve si dhe një automjet me vlerë 200 mijë lekë.
Në fund të vitit 2017, pasuria familjare e Besnik Canit është rritur me 29 herë dhe kap vlerën e 26.8 milionë lekëve. Pasuritë e paluajtshme përbëjnë pjesën kryesore të pasurisë dhe llogariten në 22.3 milionë lekë. Prokurori Cani zotëron gjithashtu likuiditete të bankë në vlerën e 2.5 milionë lekëve, automjete me vlerë 1.3 milionë lekë dhe kursime në cash prej rreth 634 mijë lekësh.
Të ardhurat familjare gjatë periudhës deklaruese janë 36.7 milionë lekë. Rreth 80 për qind e të ardhurave kanë si burim pagën nga funksioni i prokurorit dhe pagat e familjarëve, 11.5 për qind llogariten si të ardhura nga qiraja dhe 4.7 për qind kanë si burim biznesin e të birit si person fizik.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Kontrolli aritmetik/logjik për 14 vitet e deklarimit rezultoi pa diferenca negative mes të ardhurave dhe shpenzimeve.
Më konkretisht, zoti Cani ka deklaruar në total borxhe të marra nga të afërm në vlerën e 1.8 milionë lekëve dhe 6 mijë eurove, të cilat janë deklaruar përgjatë viteve si burim për pasuritë e paluajtshme. Në fund të vitit 2017, subjektit i mbeten ende pa shlyer rreth 535 mijë lekë.
Përveç truallit mbi të cilën ngrihet shtëpia e tij, subjekti ka deklaruar në vitin 2016 se ka blerë një sipërfaqe tjetër në Paskuqan; 363.7 metra katrorë për 1.5 milionë lekë. Në të njëjtin vit, prokurori Cani lidh një kontratë qiraje për 25 vjet me kompaninë “Kastrati”, ku kjo e fundit merr përsipër ndërtimin e një karburanti, një lokali dhe një lavazhi në këtë tokë.
