Kryeministri Edi Rama ka mbledhur Komitetin Kombëtar të Sigurisë mbi monitorimin e situatës mbi Koronavirusin.
Sipas kryeministrit Rama, pavarësisht se Shqipëria gjendet afër Italisë, e cila është pushtuar nga koronavirusi, vendi ynë nuk ka deri më tani asnjë rast të prekur nga virusi vdekjeprurës. Ndërsa ka kërkuar nga njerëzit që mos bien pre e informacionit të rremë.
“Deri më tani nuk është gjetur origjina e vërtetë e virusit, dhe pacienti ‘zero’. Një nga pyetjet që sot diskutohet, është se përse vendet në afërsi të Kinës nuk kanë asnjë të prekur. Infodemia ka prekur mbarë botën sipas OBSH-së dhe në mënyrë të pashmangshme edhe Shqipërinë. Situata infodemike është shfaqur më shumë se një formë. Nga ana tjetër, një karakteristikë një formë jo shumë e përhapur në vende të tjera, por jo në Shqipëri është përpjekja individuale apo e grupeve të caktuar për të nxitur panikun dhe për të prodhuar alarme të vazhdueshme për interesa politike dhe mediatike. E para, deri më sot, tani që flasim, në Shqipëri nuk kemi asnjë rast të konfirmuar me koronavirus. Janë testuar deri më sot 17 raste të dyshuara për koronavirus kanë rezultuar negativë. Është fakt se nga momenti i parë janë marrë masat duke fuqizuar sistemin alert, nga pikat kufitare te emergjencat kombëtare”, u shpreh Rama.
