Është mbyllur shumë keq pjesa e parë e Reims-PSG, ndeshje e vlefshme për javën e dhjetë të kampionatit francez të futbollit.
Kampionët në fuqi të Francës, në fakt, kanë mbetur me dhjetë lojtarë në minutën e 41-të. Lojtari i ndëshkuar ka qenë Sergio Ramos.
Ish-kapiteni i Real Madrid, i cili njihet për gjaknxehtësinë e tij në fushën e lojës, ka reaaguar ashpër ndaj arbitrit pasi ky i fundit ka dhënë një faull kundër Verratti-t.
Gjyqtari e ka ndëshkuar menjëherë me karton të verdhë qendërmbrojtësin spanjoll, por ky i fundit duhet të ketë thënë ndonjë fjalë më shumë se duhet, sepse pas pak sekondash ka ardhur edhe i verdhi i dytë.
Pjesa e parë është mbyllur në barazim 0-0, me ekipin e Galtier që kanë shkuar në dy raste afër golit, por janë ndalur nga pritjet e portierit të Reims.
