Kur përmendet fraza “Zonja e Hekurt”, të gjithëve iu shkon mendja tek Margaret Thatcher. Megjithatë, sot në Evropë, duket se ka një ‘Zonjë të re të Hekurt’, dhe kësaj here nuk është e Britanisë.
Bëhet fjalë për kryeministren e Estonisë dhe zërin më të fortë të Evropës kundër Vladimir Putinit, të cilin ajo e quan “terrorist” dhe “kriminel” që duhet të përballet me drejtësinë për krimet e luftës në gjykatat ndërkombëtare.
Ajo quhet Kaja Kallas dhe ishte liderja e parë që uroi Ukrainën për shkatërrimin e një ure kyçe që lidh Rusinë dhe rajonin e aneksuar të Krimesë, dhe e bëri këtë edhe pse Kievi nuk kishte marrë përgjegjësinë për sulmin.
“Ukraina duhet ta fitojë këtë luftë,” tha Kallas në Pragë gjatë samitit të mbajtur në Pragë të Republikës Çeke ku ajo ripërsëriti thirrjet për më shumë sanksione ndaj Moskës dhe më shumë armë për Kievin.
Kallas, një nënë 45-vjeçare e tre fëmijëve, u dallua me fustanin e saj blu mes 44 liderëve të Europës, kryesisht meshkuj, të cilët u mblodhën për takimin e parë të Komunitetit Politik Evropian në Pragë, ditën e enjte.
Që nga gushti, Estonia ka dërguar 250 milion euro ndihmë ushtarake në Ukrainë, duke përfshirë raketa antitank Javelin, mina antitank, granatahedhës, municione dhe automjete.
Kallas ishte 11 vjeç kur babai i saj Siim e çoi në Berlinin Lindor dhe në Portën e Brandenburgut në vitin 1988, një vit para rënies së Murit të Berlinit. “Kam lindur nën pushtimin sovjetik. Më kujtohet koha sovjetike. Unë isha një brez që jetonte pa liri. Kështu që unë nuk e marr si të mirëqenë dhe e kuptoj vlerën e saj”, thotë Kallas.
