Kryebashkiaku i Tiranës Erion Veliaj deklaroi gjatë mbledhjes së Këshillit Bashkiak se me përfundimin e projektit të Unazës së Madhe, Tirana nuk do të bllokohet, pasi pas Astirit projekti do të vijojë në pjesën jugore të qytetit nga Pallati me Shigjeta deri në Kashar.
“Sot miratojmë akt marrëveshjen e rëndësishme: Bashkia do subvencionojë me 3 vjet qera dhe do ndërtojë tre pallate për ata që preken nga projekti dhe janë të palegalizuar. Me përfundimin e punës për Unazën e Madhe në zonën e Astirit, projekti do të vijojë në pjesën jugore të qytetit, me zgjerimin e lumit të Lanës, nga Pallati me Shigjeta deri në Kashar. Në funksion të ecurisë së projektit, i cili po kryhet nga Qeveria dhe Bashkia e Tiranës, Këshilli Bashkiak i Tiranës miratoi sot Akt Marrëveshjen Tip “Për përfitimin e trajtimit përmes fondit të banesave nga poseduesit e ndërtimeve pa leje, që preken nga ky projekt dhe nuk përfitojnë dot nga legalizimi”, tha Veliaj.
Kryebashkiaku Erion Veliaj tha se miratimi i këtij akti është shumë i rëndësishëm për të ecur përpara me punimet e Unazës së Madhe të Tiranës.
