Vdekja e Lear Kurtit, mbetet ende e pazbardhur dhe ditë pas dite po dalin në dritë detaje të reja.
Gazetarja Klodiana Lala ka treguar bisedën e zhvilluar mes të ndjerit dhe efektivëve të policisë mbrëmjen e 19 tetorit.
E ftuar në “Opinion”, Lala tha se Kurti ka shfaqur shenja dridhjeje kur është ndaluar nga efektivët, pork a folur me ta. Gazetarja shtoi se 32-vjeçari u ka thënë se ka hedhur një dozë me kanabis dhe se efektivët duhet të nisni ta kërkonin drogën.
“Lear Kurti ka qenë duke ecur në rrugë qetësisht kur efektivët i kanë thirrur nga dritarja e makinës dhe e kanë pyetur nëse është banor i lagjes. Ai është shoqëruar edhe më herët në polici. Njihej për konsumimin e lëndëve narkotike, miqtë dhe familja kanë treguar se ai kishte një fobi kundrejt uniformave të policisë. Kur i kanë kërkuar kartën e identitetit, ai ka vrapuar. Pas ndjekjes, e kanë kapur tek marketi dhe ai ka filluar të japë shenja dridhjeje. Ata janë afruar dhe kanë dashur ta ngrenë. Ndër të tjera, ai u ka thënë, kam hedhur një dozë hashash, shkoni dhe gjejeni. Këtë u ka thënë,”- tha Lala.
