Turqia ka hapur kufirin duke lëshuar emigrantët drejt Greqisë dhe vendeve të tjera. Nga ana e saj, policia kufitare greke zhvilloi një përleshje të vërtetë me qindra emigrantë sirianë që mësynë kufirin në Kastania. Policia u detyrua të përdorte edhe gazin lotsjellës për shpërndarjen e tyre.
Greqia, e cila ka një marrëdhënie historike të tensionuar me Turqinë, akuzoi Ankaranë zyrtare se e ka organizuar situatën me emigrantët në kufi dhe premtoi se do t’i mbajë ata jashtë territorit të vendit.
Nga ana e saj, Turqia deklaroi të enjten se nuk do të përballet më me fluksin e azilkërkuesve sirianë dhe do t’i lejojë ata të kalojnë drejt kufijve europianë, pas sulmit ajror në Idlib ku humbën jetën 33 ushtarë turq.
“Emigrantët nuk erdhën në këtë pikë kufitare me mendjen e tyre. Ata u dëbuan nga fqinjët tanë turq dhe u përdorën prej tyre”, u shpreh ministri i Rendit Publik, Michalis Chrysohoidis. Ndërsa zëdhënësi i qeverisë Stelios Petsas u shpreh se Greqia u përballë me një tentativë masive dhe ilegale për thyerjen e kufirit dhe se forcat e policisë ja arritën të pengonin më shumë se 4000 persona që të hyjnë në territorin grek.
Turqia iu përgjigj akuzave të Greqisë. Ministri i Jashtëm, Cavusoglu akuzoi Athinën për shkelje të ligjit ndërkombëtar duke hedhur gaz lotsjellës ndaj qindra të pafajshmëve që ishin mbledhur në portat e saj.
