Gjykata e Durrësit ka caktuar sot masën e sigurisë “arrest me burg” për Ruzhdi Tosunin, i cili vrau pak ditë më parë në mënyrë tragjike bashkëshorten e tij, Hajdie Tosuni, brenda biznesit të tyre. Në seancën e sotme gjyqësore, vrasësi është paraqitur i qetë dhe i penduar për krimin e rëndë, duke lënë jetime tre vajzat e tij.
Nga brenda kafazit të hekurt ai ka kërkuar falja për krimin e rëndë, ndërkohë ka dhënë detaje të tjera të tmerrshme për krimin që i mori jetën bashkëshortes së tij. Burime nga gjykata e Durrësit bëjnë të ditur se Ruzhdi Tosuni i ka thënë gjykatë: “Ishte një konflikt i çastit. Ofenduam njëri-tjetrin për ca borxhe që kishim. Jam shumë i penduar. I kërkoj falje familjes dhe fëmijëve, nuk duhet të kisha arritur këtu!”- ka thënë Tosuni para togave të zeza.
Ndërkohë bëhet me dije se i pranishëm në seancë, prokurori i çështjes është shprehur se viktima është qëlluar gjashtë herë në kokë me një metal 70 cm, me ganxhe, që shërbente për të ulur qepenin e dyqanit. Aktin makabër burri ua tregoi shokëve me të cilët ndante ditën kur shkonte në punë tek biznesi i tij por askush nuk e besoi deri sa erdhi policia.
Referuar të dhënave që vijnë nga Durrësi bëhet me dije se në fakt mes çiftit ka patur konflikt të herëpashershëm dhe se Ruzhdiu ka patur probleme të theksuara në familjen e tij jo vetëm me bashkëshorten, por edhe me të bijat pasi ai kishte borxhe të mëdha dhe se shkaku i gjithë asaj masakre ishte konkretisht borxhi për të cilin ai kërkonte të shiste edhe dyqanin.
Në mes, dyshohet se është edhe historia e një lidhjeje tjetër me një grua, të autorit të vrasjes, lidhje që mendohet që burri kishte investuar të gjitha paratë për të cilat tashmë i duhej edhe shitja e dyqanit. Megjithatë prokuroria ende nuk është shprehur me fakt konkrete nga hetimi dhe dëshmitë. n.k/Fjala.al/
