Ermal Mamaqi ka qenë në qendër të vëmendjes në rrjetet e platformat sociale së fundmi për shkak të projektit të tij të ri, librit “Në garë me veten”. Sigurisht komediani, që prej disa kohësh ofron me sukses edhe trajnime motivuese e vetëzhvillimi e që për këtë flet edhe libri i tij, ka marrë duartrokitje dhe komplimenta për punën, por edhe mjaft kritika e reagime negative.
Në emisionin “Jeto me Orën” në RTV Ora Ermali tha se ishte momenti që të gjitha ato që ka mësuar ti vendoste në një libër.
Por cili është suksesi i vërtetë për të?
Mamaqi thotë se gjithçka ka nisur në një moment të vështirë në jetën e tij.
“Ka qenë një moment i jetës sime që kam qenë shumë rëndë, janë këto momentet ku ti nuk qohesh dot nga krevati. Nuk do të bësh asgjë. Nuk do të të ndodhë asgjë, por i prek tokën. Dhe një nga këto momentet ka qenë kur unë mendoja se çfarë duhet të bëj dhe mora pjesë në një seminar motivimi dhe pashë se çfarë bëhej. Pastaj kam ngrënë çdo lloj libri për zhvillimin personal, mund të kem lexuar 200 libra. Dhe nga ai moment më duket sikur kam qenë aq sëmur, kam pirë aq shumë ilaçe saqë më duket sikur tani edhe kur teshtij shëroj dikë”, tha me shaka Ermali.
