Avokati, Spartak Ngjela e ka quajtur ‘lëvizje esatise’ (tradhëtare) protestën e planifikuar nga Partia Demokratike për t’u mbajtur në 6 dhjetor në Tiranë, ditën kur liderët e BE-së vizitojnë Tiranën. Ndërsa deputeti i PD, Luan Baçi theksoi se protesta bëhej në të mirë të qytetarëve dhe se ishte një mikpritje për liderët e BE-së.
Nëpërmjet një lidhje ‘skype’ për emisionin ‘Sot Live në Shqipëri’ në Report TV, avokati tha se kreu i ‘Rithemelimit’ Sali Berisha ishte kundër perëndimit dhe historia do ta gjykonte opozitën për këtë lloj proteste që sipas tij ishte njësoj si të protestohej kundër anëtarësimit të Shqipërisë në BE.
“Deri te pjesa e parë që është demokraci është e vërtetë. Kurse fakti që këtu është samiti i BE për të na futur në BE lëvizja është esatiste. Do ta kishte zili Esat Pashë Toptani që ka varrin në Beograd. Nuk duhej ta bënin këtë gabim sepse bëhet fjalë subjekt juridik si samiti europian. Pse do protestojnë? Kundër Europës? Kundër futjes së Shqipërisë në BE? Ose është i paaftë intelektualisht ose bën sikur nuk kupton. Ne nuk mund të na marrin për budallenj. Kreu i tyre nuk është me perëndimin, sepse është non grata atje. Më dëgjoni mua, merrni tufat me lule dhe shkoni atje, mos i shërbeni Esat Pashës. Ne shyqyr që po bëjmë një samit perëdimor këtu, këta kërkojnë të sjellin këtu Lindjen e Mesme. Kush është pro perëndimit nuk bën protestë në atë datë”- u shpreh Ngjela.
