Një ngjarje e rëndë e ndodhur para disa ditësh është zbuluar vetëm ditën e sotme. Aktori i njohur, Rezart Veleshnja ka rënë pre e një grabitjeje të dhunshme, sapo ka tërhequr para në një bankomat në një zonë shumë të populluar të Tiranës, e cila nuk bëhet ende e ditur me saktësi.
Mësohet se aktori i humorit është goditur në befasi nga një grup personash. Më pas agresorët i kanë futur duart në xhepa dhe i kanë marrë të gjitha të hollat që Veleshnja kishte me vete. Si pasojë e sulmit, aktori Rezart Veleshnja ka pësuar lëndime deri në një shkallë të rëndë, në disa pjesë të trupit.
Pas ngjarjes policia ka arritur të zbulojë grabitësit dhe t’i arrestojë. Deri më tani nuk është dhënë asnjë informacion mbi identitetin e grabitësve, por raportohet se Veleshnja nuk është viktima e vetme e një grabitjeje të tillë. Grabitësit tashmë rrezikojnë nga 5 deri në 15 vite burg për grabitje me dhunë.
