Kryeministri Edi Rama ndau sot në rrjetet sociale të tjera momente nga shpërndarja e dhuratave pranë familjeve në nevojë në këto ditë festash.
Rama ndau momente nga vizita e ministres së Arsimit dhe Sportit, Evis Kushi në dy familje në Elbasan.
“Me dhurata për Vitin e Ri u gëzuan edhe 2 fëmijët e familjes Petroshi, e cila është përfituese e programit të mbështetjes ekonomike, si dhe 2 fëmijët e familjes Hida, e cila është përfituese e programit të mbështetjes ekonomike të dyfishtë, si kryefamiljare, nënë me 2 fëmijë nën 18 vjeç”, shkruan Rama.
Qeveria ka rritur me 10 % masën e përfitimit për të gjitha familjet që ndodhen në ndihmë ekonomike.
Po ashtu është dyfishuar masa e përfitimit për gratë kryefamiljare me dy fëmijë, të cilat janë brenda ndihmës ekonomike dhe për personat mbi 65 vjeç, të cilët janë të vetmuar dhe nuk përfitojnë nga pensione apo pensione sociale.
Ministrat e kabinetit qeveritar kanë qenë këto ditë festash pranë familjeve në nevojë, duke shpërndarë dhurata për fëmijët.
