Kryeparlamentarja Lindita Nikolla ndan një mesazh ngushëllimi për ndarjen nga jeta të Odise Porodinit, kryetar i Organizatës së LANÇ. Jeta e tij thotë Nikolla, ishte një model sakrificash për vendin tonë.
“U nda nga jeta ish partizani dhe Kryetari i Organizatës së Veteranëve të Luftës Antifashiste Nacional-Çlirimtare, Odise Porodini. Jeta e tij ishte një model sakrificash për Shqipërinë, lirinë dhe progresin.
Si Kryetar i Organizatës së Veteranëve, kontribuoi deri në çastet e fundit të jetës për edukimin e brezave me dashurinë dhe përkushtimin për atdheun. Pushofsh në paqe, Odise”, shkruan Kryetarja e Kuvendit, Lindita Nikolla.
Porodini ka mbyllur sytë përgjithmonë në moshën 92-vjeçare duke lënë pas një dhimbje të madhe te familjarët, kolegët dhe të gjithë ata që e njihnin.
Për merita lufte e pune, ai kishte 8 urdhra e medalje të ndryshme. Ai gjithashtu mbante edhe titullin e lartë “Nderi i Organizatës së Veteranëve të LANÇ”, “Nderi i Organizatës së Familjeve të Dëshmorëve të LANÇ dhe Dëshmorëve të tjerë të Atdheut” dhe i Shoqatës së Invalidëve të Luftës”, “Nder i Qarkut të Gjirokastrës”, si dhe çerifikatën e mirënjohjes nga Bashkia e Tiranës.
