Kreu i partisë Demokratike Sali Berisha ka dërguar njerëzit e tij për të protestuar në shtëpinë e kryeministrit Edi Rama, si një sinjal se akuza është personale. Berisha tha dje se po bëhen gati për protestën nën sloganin “Faktet dolën- Dorëheqja është detyrim”, ndërsa ka “premtuar” se më datë 11 kur do mbahet protesta, Rama do të japë dorëheqjen.
Partia Demokratike e cila mbështet ish-kryeministrin Sali Berisha ka dalë në protestë pasditen e djeshme por ndryshe nga herët e tjera. Ndërsa ka qenë bulevardi, Parlamenti, ministritë vendi ku protestohet, kësaj herë ata i janë drejtuar shtëpisë së kryeministrit Edi Rama në Surrel, duke i lënë atij përgjegjësinë personale për marrëdhënien që ai ka pasur dhe ka me ish- agjedntin e FBI-së Charls McGonigal, i cili u arrestua dhe është akuzuar nga prokuroria e Neë Yorku për korrupsion dhe abuzim me detyrën e tij si agjent. Gjithashtu në takimet e përditshme me drejtues të PD-së së Tiranës, Berisha u shpreh se në protestën e madhe sipas tij të 11 shkurtit Rama do detyrohet të japë dorëheqjen. Por demokratët nuk kanë “pritur 11 shkurtin”, pasi ditën e djeshme një grup të rinjsh kanë shkuar me parrula në duar shoqëruar këto me foton e Ramës dhe McGonigal në afërsi të banesës së kryeministrit në Surrel të Tiranës. Të rinjtë e FRPD kërkojnë që kreu i qeverisë të largohet nga posti dhe që drejtësia ta ndëshkojë pas zbulimit të skandalit mbi çështjen “McGonigal”. Një prej protestuesve është shprehur se Rama është i vendosur të shkatërrojë opozitën. “Nëse deri dje kërkonim që ai të largohej, sot kërkojmë që ai të ndëshkohet me burg. Janë të paktën 2 mln euro të cilat Edi Rama i ka bërë me paratë e korrupsionit. Sot për fat ndiqet dhe nga FBI-ja. Në vend të bashkëpunonte me partnerët tanë, me SHBA-të ai shkoi dhe korruptoi për të shkatërruar opozitën. Ai është i vendosur të na shkatërrojë, ne jemi të vendosur që ai të shkojë në burg”, tha një nga protestuesit.
Reagimi i Berishës
Kreu i Partisë Demokratike, Sali Berisha, në një dalje për mediat këtë të hënë, ka paralajmëruar kryeministrin Edi Rama se do të ketë të njëjtin fat si ish-zyrtari i FBI, Charles McGonigal. Ai tha se Rama nuk ia doli që të përjashtoi opozitën nga zgjedhjet e 14 majit, ndërsa shtoi se në protestën e 11 shkurtit do të rrëzohet qeveria. “Skenar që u zhvillua në tre etapa, në zyrat e McGonigal kundër Muzinit e cila u kurorëzua me marrjen në ndjekje penale të Bashës dhe mbylljes së dosjes nga Rama, së dyti sanksionimi i Berishës sepse nuk do pranonte që PD të bashkëqeverisje me Ramën, e treta Rama në mënyrën më kriminale nuk ndalon në veprën e tij makabre për të qeverisur pa opozitë, por do të përjashtojë nga zgjedhjet e 14 majit PD. Por kjo dëshirë e tij merr fund… aty ku përfundoi McGonigal do përfundojë edhe Rama, si një njeri që i futi thikë në zemër marrëdhënieve me SHBA”, tha Berisha. Ai nënvizoi se në 11 shkurt do të zhvillohet protesta për largimin e Ramës. “Në 11 shkurt në ora 12, shqiptarët kudo që janë, janë të ftuar të vërshojnë drejt Shqipërisë. Shqipëria po zien këto ditë. 11 shkurti do jetë dita e protestës më të fuqishme, ndaj dhe ftesa ime për shqiptarët është: Të gjithë në protestë për të ngritur zërin kundër regjimit të kalbur”, tha Berisha.
Slogani i protestës
“Faktet dolën-Dorëheqja është detyrim,” është një nga sloganet me të cilët opozita pritet që të protestojë më 11 shkurt kundër qeverisë Rama. Partia Demokratike ka publikuar pasditen e së hënës spotin e protestës ndërsa u bën thirrje shqiptarëve të bashkohen kundër “skandalit Rama – McGonigal”. “Pluralizimit i dalim Zot. Votës së lirë i dalim Zot,” janë po ashtu slogane të protestës që do të mbahet në orën 12.00 para kryeministrisë. Disa ditë më parë, kreu i Partisë Demokratike, Sali Berisha, në një deklaratë për media u shpreh se protesta e 11 shkurtit në Tiranë do të jetë më e madhja që ka parë ndonjëherë kryeqyteti.
