Ish-kryeministri Sali Berisha i ka kërkuar ish-ministrit të Financave Arben Ahmetaj që të pendohet dhe të bashkëpunojë me drejtësinë për të zbërthyer aferën e inceneratorëve.
Ndërsa ndaj ish-zëvendëskryeministrit dhe Ministrit të Financave Arben Ahmetaj janë ngritur katër akuza ndaj SPAK për çështjen e inceneratorëve, opozita ka kërkuar që të kthehet në “bashkëpunëtor të drejtësisë” dhe tregojë skemën e ambuzimit të madh. Nga foltorja e Parlamentit, ish-kryeministri Sali Berisha i ka bërë thirrje Arben Ahmetajt që të bëhet i penduar i drejtësisë dhe të tregojë të vërtetën e inceneratorëve. Në fjalën e tij Berisha tha se Ahmetaj është fajtor, por shtoi se rol kryesor në aferën e inceneratorëve ka Edi Rama. “Jam këtu për ti informuar qytetarët lidhur me Arben Ahmetajn, i cili është vendosur nën hetim. Theksoj se kam mbështetur dhe do të mbështes çdo zbatim ligji. Theksoj se Ahmetaj është përgjegjës ndër më kryesorët në aferën e tmerrshme të djegësave. Ahmetaj ka firmën në transferimin e fondit të emergjencës në djegësin e Elbasanit dhe Fierit. Ahmetaj ka miratuar me siglim dhe firmë të gjitha procedurat antiligjore në këtë proces. Ahmetaj ka qenë i lidhur si mishi me thoin me Mërtirin dhe Zoton, njëri prej tyre ka punuar edhe në “Hermes” në kompaninë e tij kur vidhte impulse në Albtelecom. Por autori i djegësave është vetëm një dhe ai e ka emrin Edi Rama. Thirrja ime është: Arben Ahmetaj të bëhesh i penduar i drejtësisë. Ke vjedhur edhe ti, por ke vetëm një rrugë; të zbërthesh para kombit tënd të gjithë veprimtarinë e organizatës kriminale”, është shprehur Berisha. Ish-Kryeministri tha se Arben Ahmetaj është fajtor por kjo aferë sipas tij nuk mund të bëhej pa Edi Ramën, të cilin e konsideroi kokën e krimit. “Arben Ahmetaj është përgjegjës ndër më kryesorët në aferën e tmerrshme të djegësve. Arben Ahmetaj ka firmën në tranferimin e fondit të emergjencës për Elbasanin dhe Fierin. Arben Ahmetaj ka miratuar me siglim dhe me firmë të gjithë procedurat anti ligjore,. Arben Ahmetaj ka qenë i lidhur si mishi me thoin me Mirel Mërtirin dhe Klodjan Zoton. Por duhet të themi këtu se krye autori i aferës 600-700 milionëshe në total nuk mund të realizohej vetëm me firmën dhe insistimin e Arben Ahmetajt. Edi Rama është përgjegjësi numër 1 dhe autori kryesor i kësaj me afere”, tha Berisha. Duke folur për çështjen e inceneratorëve Sali Berisha e pati një debat në distancë me ministrin e Drejtësisë, Ulsi Manja. Ish-Kryeministri e akuzoi Manjën se ka firmosur aferën e inceneratorëve, ndërkohë që ministri i tha se ministrat e tij kanë firmosur për Gërdecin.
