Shqipëria e 21 vjeçarëve ka zhvilluar pasditen e sotme në Antalia të Turqisë miqësoren e dytë ndaj Polonisë. Kuqezinjtë u mundën me rezultatin 2-0, në një ndeshje ku kuqezinjtë e drejtuar nga Alban Bushi ishin dominues përballë kundërshtarëve.
Trajneri hodhi në fushë këtë formacion titullar: Simoni; Buxhelaj, Mitaj, Preka, Dajko; Berisha; Ismaili, Pajaziti; Kurtulan, Shpendi; Toçi. Dy ndryshime në mbrojtje për trajnerin Bushi në krahasim me ndeshjen e fituar ndaj Azerbajxhanit.
Elmando Gjini dhe Agan Mjaki, për shkak impenjimesh me klubet e tyre dhe dëmtimesh, nuk ishin titullarë dhe u zëvendësuan nga Dajko dhe Preka. Loja filloi me kuqezinjtë në zotërimin e topit, por u goditën në minutën e 11′ pas një gabimi në qendër të mbrojtjes.
Szymon Ulodarczyk gjeti rrugën e rrjetës për polakët. Kuqezinjtë morën lojën nën kontroll duke fituar terren. Rasti i parë për gol erdhi në minutën e 38′. Në minutën e parë shtesë u regjistrua dhe rasti më i mirë për kuqezinjtë.
Stiven Shpendi u gjend i vetëm përballë portierit Bakovski, por nuk arriti ta kalojë atë. Pjesa e dytë erdhi me një tjetër mundësi shënimi në minutën e 54′. Pas një krosimi nga krahu i djathtë, topi kaloi zonën e vogël, por asnjë nga sulmuesit nuk arriti ta shtyjë në rrjetë.
Në minutat 63′-70′, kuqezinjtë shtuan presionin dhe ishin të gjithë në zonën polake, duke tentuar shumë herë me Toçin, Pajazitin dhe Kurtulan. Në minutën e 80′, kapiteni Berisha pati një shans të mirë me një goditje dënimi përpara zonës së Polonisë. Por nuk gjeti kuadratin me topin që shkoi pak mbi tranversë.
Një minutë më vonë polakët realizuan dhe golin e dytë, me të njëjtin autor, Ulodarczyk, i cili përfitoi nga një tjetër gabim në qendër të mbrojtjes.
Në këtë ndeshje të dytë miqësore, trajneri Bushi pati mundësi të aktivizojë të gjithë lojtarët që kishte marrë në grumbullimin një javor. Dy ndeshje për 21 vjeçarët, ku në të parën triumfuan 2-1 ndaj Azerbajxhanit.
Sot u mundën nga polakët. Duhet theksuar se ndeshja e zhvilluar nga kuqezinjtë ishte pozitive. Ata krijuan shumë raste për shënim, por pa arritur të konkretizonin.
