Kjo video tregon të gjitha rastet e koronavirusit në botë që prej 23 janarit dhe deri më 10 mars. Interesant është të shihet se si Singapori dhe Tajlanda, dy shtetet që shënuan fillimisht më shumë raste të koronavirusit, përveç Kinës, sot nuk gjenden në hartën e rrezikut.
Deri më 20 shkurt, kur virusi ishte përhapur masivisht në Kinë, Singapori dhe Tajlanda ishin ndër shtetet që kishin raportuar më shumë raste në botë, por masat e menjëhershme dhe mos-neglizhenca dhanë rezultate në parandalimin e përhapjes.
Aktualisht në Singapor janë 82 persona të infektuar me koronavirus, 96 konsiderohen të shëruar dhe nuk është regjistruar asnjë vdekje. Ndërsa në Tajlandë janë 35 persona të infektuar, 34 të shëruar dhe një ka ndërruar jetë.
Në 10 mars, në listën me 15 shtetet më të prekura në botë (përjashto Kinën), 11 janë në Evropë, me Italinë kryesuese, 3 janë në Azi (Kore e Jugut, Japoni dhe Iran) dhe 1 në Amerikën e Veriut (SHBA).
