Presidenti i Republikës së Maqedonisë së Veriut, Stevo Pendarovski, ka bërë të ditur se ka dërguar ushtrinë në Dibër dhe Qendër Zhupë për të mbështetur qeverisjen lokale në sigurimin e kufirit me Shqipërinë për shkak të koronavirusit.
Përmes një postimi në faqen e tij zyrtare në “Facebook”, Pendarovski shkruan se ky vendim është marrë për të ndaluar përhapjen e virusit të rrezikshëm.
Statusi i plotë në Facebook:
Kam marrë vendim për të vendosur Ushtrinë e Republikës së Maqedonisë së Veriut për të mbështetur vetëqeverisjen lokale në Dibër dhe Qendër Zhupë dhe për të mbështetur forcat policore të Ministrisë së Brendshme në sigurimin e një pjese të kufirit shtetëror me Republikën e Shqipërisë në territorin e komunës së Dibrës.
Vendimi u mor për të parandaluar përhapjen e virusit Corona # COVID19 dhe për të hequr pasojat e epidemisë, pas deklarimit të një krize në komunat Dibër dhe Qendër Zhupë.
Njësitë e Ushtrisë do të koordinojnë aktivitetet e tyre dhe do të bashkëpunojnë me pushtetin vendor në Qendër Zhupë, policinë, Qendrën e Menaxhimit të Krizave dhe institucionet e tjera shtetërore të përfshira në trajtimin e krizës./Fjala.al/
