Nga situata e krijuar si pasojë e koronavirusit shumë farmaci rritën çmimet për maskat, solucionet dhe produkte të tjera farmaceutike duke sjellë edhe reagimin e qytetarëve të shumtë.
Pas ankesave të qytetarëve, farmacive iu kërkua të mos abuzonin me çmimet. Disa prej tyre iu bindën urdhrit, disa të tjera jo. Kështu policia e Durrësit ka kryer disa kontrolle të befasishme në të gjitha farmacitë e qytetit.
Nga kontrollet e policisë, janë proceduar dy pronarë farmacish, të cilën akuzohen për “Fshehje të të ardhurave”.
Njoftimi i policisë: Durrës/ Strukturat e DVP Durrës, kontrolle të befasishme në të gjitha farmacitë, për parandalimin e tregtimit të medikamenteve me çmime abuzive dhe fshehjes së të ardhurave. Finalizohet operacioni i koduar “Medikamenti”.
Procedohen penalisht 2 pronare të farmacive, për veprën penale “Fshehja e të ardhurave”. Specialistët për Hetimin e Krimit Ekonomik dhe Financiar në Drejtorinë Vendore Durrës, në zbatim të masave të përcaktuara në Planin e Masave për parandalimin, evidentimin dhe goditjen e rasteve abuzive të tregtimit të medikamneteve me çmime të rritura fiktivisht, duke përfituar nga situata emergjente e COVID-19 që po kalon vendi, si dhe fshehjen e të ardhurave të përfituara nga abuzimi me çmimet, kanë organizuar dhe finalizuar operacionin policor “Medikamenti”, në kudër të të cilit u proceduan penalisht 2 shtetase, pronare të farmacive dhe konkretisht shtetaset: S. L., 32 vjeçe, banuese në Durrës dhe E. D., 40 vjeçe, banuese në Shijak, Durrës.
Gjatë kontrollit të ushtruar në farmacinë në lagjen Nr. 13, u gjetën dhe u sekuestruan një sasi disifektantësh për duart (xhela antibacterial), pa faturë tatimore, të cilët shiteshin me çmime abuzive, si dhe në farmacinë në lagjen Nr. 4, u konstatuan shitje pa kupon tatimor. Kontrollet e befasishme do vijojnë në të gjithë qarkun, për parandalimin dhe goditjen e paligjshmërisë dhe përfitimit nga situata e krijuar duke abuzuar me çmimet jo vetëm të medikamenteve, por të çdo produkti për konsum nga qytetarët.
Materialet i kaluan Prokurorisë së Rrethit Gjyqësor Durrës, për veprime të mëtejshme.
