Të apasionuarit pas historisë bëjnë me dije se mendojnë te kenë gjetur vendin e fshehtë të “Dhomës së Qelibarit”, pasi zbuluan një hekurudhë dhe vagonë në një ish-bunker nazist në Poloni, sipas mediave të huaja.
Shoqata Historike dhe Hulumtuese “Jaćwież” hasi në zbulimin e befasishëm gjatë gërmimit në kompleksin e bunkerit “Mamerki” në Poloninë veriore. Binarët e hekurudhës së ngushtë u zbuluan 5 metra nën sipërfaqe, në një zonë që kohët e fundit ishte pastruar nga pemët.
Kompleksi ishte selia e Komandës Supreme të Ushtrisë Gjermane të Hitlerit dhe ndodhet vetëm disa kilometra larg bunkerit “Strofka e Ujkut”.
Edhe pse dihej se një linjë hekurudhore shkonte nga Mamerki në “Strofkën e Ujkut”, nuk ka pasur asnjë dokument zyrtar që tregonte se ajo shtrihej brenda vetë kompleksit.
“Kjo është një surprizë e madhe pasi ne nuk e dinim që kishte një hekurudhë brenda kompleksit. A mund të jetë treni i artë me dhomën e qelibarit? Do ta marrim vesh së shpejti”, u shpreh Bartlomiej Plebańczyk nga muzeu Mamerki.
Dhoma e krijuar për carin Pjetri i Madh në shekullin e 18-të, e përbërë pikërisht nga 6 tonelata qelibar të gdhendur mjeshtërisht dhe dekorime floriri, u çmontua nga forcat naziste që kishin pushtuar vendin dhe u transportuan në Koninsberg, që sot është enklava ruse e Kaliningradit, ku u ekspozua publikisht.
Por, menjëherë pas përfundimit të luftës, elementet e dhomës u zhdukën pothuajse tërësisht, edhe pse disa copëza janë gjetur në Gjermani gjatë viteve ’90. Një kopje e “Dhomës së Qelibarit” u krijua në Shën Pjetërburg në vitin 2003, pas disa dekadash punimesh.
Për dekada, “gjuetarët” e thesareve kanë kërkuar Europën për pasuritë e humbura, por pa rezultat.
