Rritja e pagave në sektorin publik, e cila ende nuk është reflektuar në listëpagesa, ka sjellë vonesa në dorëzimin e tyre nga administrata publike, institucionet vendore si dhe ato kushtetuese.
Për të shpëtuar entet publike nga gjobat tatimore që parashikon ligji në fuqi, Ministria e Financave, ka miratuar një ndryshim në udhëzimin për “Procedurat tatimore në Republikën e Shqipërisë”, sipas të cilit, “gjobat për deklaratë të pasaktë dhe pagesë të vonuar të detyrimeve për shkak të ndryshimit të listëpagesave dhe gjobat për deklarim të vonuar të formularëve të të punësuarve për herë të parë, atyre rishtazi, si dhe të larguarve nga puna, nuk aplikohen për organet e qeverisjes qendrore apo vendore, institucionet kushtetuese dhe institucionet e tjera që financohen nga buxheti i shtetit, në rastet e: zbatimit të një akti ligjor apo nënligjor me efekte prapavepruese; zbatimit të një vendimi gjykate të formës së prerë; zbatimit të një vendimi të Gjykatës Kushtetuese apo Gjykatës së Lartë; vonesave në nxjerrjen apo dërgimin e vendimeve të emërimit të punonjësve nga organet që kanë këtë të drejtë.
Referuar udhëzimit në fjalë, në këto raste, gjobat ndaj organeve të përcaktuara më lart nuk zbatohen pasi deklarimet apo ndryshimet e listëpagesave me vonesë nuk kanë ardhur për shkak të veprimit apo mosveprimit të këtyre institucioneve”.
Sipas ligjit në fuqi, tatimpaguesi, i cili nuk paguan brenda afatit të parashikuar në ligj shumën e detyrimit tatimor, ose të kontributit të sigurimeve shoqërore e shëndetësore, apo dorëzon një deklaratë të pasaktë, detyrohet të paguajë një gjobë të barabartë me 0.06 % të shumës së detyrimit të papaguar për çdo ditë, gjatë së cilës pagesa nuk është kryer.
Në asnjë rast, gjoba nuk llogaritet për një periudhë më të gjatë se 365 ditë kalendarike.
