Në një kohë kur presioni në Shqipëri, por edhe në të gjithë Evropën, po rritet mbi qeveritë për të realizuar sa më shumë teste të qytetarëve për koronavirus, kryeministri Edi Rama ka sjellë shembullin e Zvicrës.
Sipas Ramës, në Zvicër testet janë fokusuar vetëm në moshat mbi 65 vjeç ose te ata me probleme të tjera shëndetësore në mënyrë që të ulet rreziku për humbjen e jetëve.
“Të gjithë duhet ta mësojmë që tampon nuk është si kontrolli mjekësor bazë që duhet ta bëjmë të gjithë dhe se me tampon pa tampon, kur nuk ke shenja domethënëse shqetësimesh, mjafton të zbatosh rregullat, të rrish në shtëpi kur vjen nga një zonë e prekur, kur ke pasur kontakte me njerëz që vijnë nga ato zona apo kur ke një punë që për momentin është mbyllur dhe e ke kryer detyrën në frontin tënd të luftës”, shkruan Rama.
Megjithatë, rasti i Zvicrës mund të konsiderohet ende eksperimental, ndërkohë që Kina dhe Koreja e Jugut konsiderohen tashmë raste të provuara suksesi. Dy shtetet aziatike e konsiderojnë të mbyllur luftën me përhapjen e koronavirusit për shkak të testeve të shumta të qytetarëve. Ashtu siç deklaroi edhe kreu i Organizatës Botërore të Shëndetësisë, koronavirusi nuk luftohet me izolim, por me sa më shumë teste.
