Kryetari i Kuvendit të Kosovës, Glauk Konjufca, pas përfundimit të takimit me kryeministrin Edi Rama, zhvilloi një prononcim për mediat.
Ai tha se vendimi i kryeministrit Albin Kurti, i cili refuzoi takimin me Ramën duhet respektuar, pasi ishte anulimi i mbledhjes së dy qeverive ajo e cila solli dhe një krisje mes marrëdhënieve të dy vendeve.
Konjufca tha se nuk kanë asnjë problem me Shqipërinë, teksa më tej shtoi se dy kryeministrat, Rama dhe Kurti mund të takohen së shpejti.
“Rama i shqetësuar nga presioni ndërkombëtar për Kosovën. Ai e ka presionin me sa duket më shumë se ne. Ne s’kemi probleme me Shqipërinë, duket sikur problemi ka ardhur nga andej jo nga ne. Ata mund të takohen së shpejti edhe pse jo sonte”, ka thënë ai.
I pyetur nëse u konsultua me kryeministrin Kurti para takimit qe zhvilloi me Ramën, Konjufca tha se :Asgjë nuk ndodh pa konsultimet me Kurtin.
“Refuzimi i Kurtit, ka qenë ide e tij dhe duhet respektuar. Marrëveshjet janë nënshkruar dhe ishte dëm i madh që nuk u bë në mbledhjen e qeverive. Ramën e pritën krerët më të lartë shtetërore, nëse do të ishim kundër tij nuk do e takonim. Kërkuam që ta ketë sensin tonë të situatës, Kosovës do e ndihmonte që të kishte përputhshmëri në relacion me çfarë përjetojmë ne nga Serbia. Nëse ne pajtohemi me idenë sesi është qasja e Serbisë ndaj nesh, nëse kemi dallime ne nuk i jemi duke i shërbyer qytetarëve të vendit tonë”, shtoi ai.
Kryeministri Edi Rama ka mbërritur sot pasdite në Kosovë në kuadër të turit ballkanik që po zhvillon për Procesin e Berlinit që do të mbahet në muajin tetor në Tiranë. Kreu i Qeverisë zhvilloi një takim me presidenten e Kosovës, Vjosa Osmani dhe më pas kryetarin e Kuvendit Glauk Konjufca. Rama mbërriti në Prishtinë pas vizitës në Shkup.
