Stuhitë e shiut gjatë muajve maj- qershor duket se nuk e lanë grurin që të piqet. Fermerët e fshatrave Grecalli dhe Mujalli në Fier thanë se e filluan korrjen vonëpër shkak të kohës me lagështi, jo normale për sezonin e verës. “Klima ndikon negativisht në korrjen e grurit, bie rendimenti. Janë faktorët e natyrës ato që ndikojnë. Korja duhet të kishte filluar, por kjo varet nga koha, pra janë faktorët e natyrës ato që ndikojnë që të mos fillojë korja. Mbin gruri në kalli e lag shiu dhe i rri i lagur dhe është shumë i ndjeshëm ai nga lagështia kokrra e grurit. Pastaj kalliri shkrepet e tund era dhe bie poshtë. Për grurin janë shumë faktorë që ndikojnë. Nëse tërë javën do të ketë shi, atëherë ai pak grurë do të bjerë përdhe”, tha një fermer në një intervistë për Report TV. Po ashtu, fermerët hodhën akuza ndaj ministres Frida Krifca, teksa ankohen për mungesë vëmendje nga Ministria e Bujqësisë, e cila nuk kryen në kohën e duhur spërkatjen e tokave dhe as nuk kompenson ata kur prodhimi dëmtohet nga faktorët natyrorë. Pasi karkaleci i tokës bëri kërdinë në të mbjella, Ministria e Bujqësisë ndërhyri në Lushnje, për të shpëtuar së paku perimet.“Jemi në fazën e duhur të trajtimit të dëmtuesit karkalec, ku ai është në fazën e parë, të dytë dhe të tretë të fazës larvore. Trajtimi që po kryhet, mendojmë se rezultati do të jetë 100%”, tha Jetmir Meta, specialist gjatë një prononcimi për “Report Tv”. Më herët është kryer spërkatja në zonën e Belshit, ndërsa ende nuk ka nisur në fusha të tjera ku fermerët ankohen për infektimin e qindra hektarë toke. Fermerët thanë se këtë vit kanë pasur dëme dhe nga karkaleci i tokës dhe minjtë e arave.“Miu i dëmton shumë, miu i arave. Ti e mbjell jonxhën ai e ngre dheun dhe ha rrënjët e jonxhës. Karkaleci, miu etj ka shumë faktorë bujqësia”, tha fermeri.
Karkaleci bën “namin” në zonën e Dumresë
Ndërkohë, karkaleci ka bërë“namin” edhe në zonën e Dumresë. Dhjetëra hektarë kryesisht me jonxhë, misër dhe vreshtari janë infektuar nga ky dëmtues. Agronomi Mehdi Shehu pranon ekzistencën e vatrave të infektuara në Dumre dhe thotë se e vetmja zgjidhje është dezifektimi i të gjitha sipërfaqeve të mbjella, pasi fermrët thotë ai pyesin dhe pak medikamente blejnë. Të shqetësuar fermerët thonë se po mbledhin sa të mundin nga kulturat bujqësore. Ata kërkojnë ndihmën e ministrisë së bujqësisë dhe pushtetit lokal. “Tani që është periudhë që gjelbërimi është në masë, tani po futet edhe te pemët. Është një shqetësim shumë i madh për fermerët, na kontaktojnë dhe ne japim rekomandimet. Duhet një luftë masive për karkalecin. Ndryshe rishfaqet prap. Është shtuar në mënyrë masive”, u shpreh agronomi. Ndërsa në fshatin Dëshiran dëmet nga karkaleci janë edhe më të mëdha. Kryeplaku Ferdi Mjeshtri, thotë se në emër të fermerëve i ka kërkuar ndihmë bashkisë të kryejë dezifektimin, por mbeten në pritje. Nga ana tjetër, nga zyra rajonale e bujqësisë dhe mbrojtjes së bimëve në Elbasan bëhet me dije se dëme nga karkaleci ka edhe në fshatrat e bashkive Elbasan dhe Cërrik, por Dumreja mbetet më problematike.
