Studentët e Mjekësisë kanë paralajmëruar se nuk do të hyjnë në auditore në muajin tetor, nëse do të kushtëzohen me diplomat.
Mesazhi i tyre u përcoll pasi përfaqësues të studentëve të Mjekësisë, zhvilluan një takim me presidentin Bajram Begaj, ku kanë kërkuar mosdekretimin e ligjit për kushtëzimin e diplomave.
Studentët thanë se kanë paraqitur tek kreu i shtetit zgjidhjet e tyre, dhe presin nga ai që të marrë një vendim në përputhje me Kushtetutën.
“Sigurisht ne i shprehëm shqetësimet tona, presidenti na dëgjoi bashkë me këshilltarët e tij. Shprehu edhe ai qëndrimin e tij, ku do të shqyrtojë këtë projektligji, tashmë ligj dhe do të pritet se si do të jetë reagimi.
Ne shkuam në takim si një përfaqësi e studentëve të Mjekësisë. Çfarë qëndrimi do të mbahet, nuk mund të flasim në këtë moment. Në tetor nuk hyjmë në auditore”, u shpreh njëra prej studenteve.
“Ideja është se kërkesa që ne kemi bërë për presidentin, mikpritja ka qenë shumë pozitive. Përqasja ishte pozitive. Presidenti na dëgjoi me vëmendje, të gjitha problematikat tona. Kemi dhënë zgjedhjet tona dhe presim një përgjigje nga presidenti për të mos dekretuar ligjin. Ai tha që gjithçka do të jetë e bazuar në Kushtetutë dhe në sugjerimet tona”, u shpreh një tjetër student.
Pak ditë më parë, Kuvendi miratoi me 71 vota pro dhe 23 kundër projektligjin që i detyron studentët e Mjekësisë të punojnë në Shqipëri pesë vite pas diplomimit.
