Këshilli Kombëtar i PD ka vendosur të anulojë zgjedhjet e datës 29 Korrik 2023, pasi e konsideron procesin antistatutor dhe fars.
Mësohet se prezent në mbledhje kanë qenë 245 anëtarë. Në mungesë të Kryetarit të Këshillit, ngrihet komisioni drejtues i punimeve që drejtohet nga Sekretari i Përgjithshëm Gazment Bardhi. Këshilli Kombëtar vendos ndryshimin e rendit të Ditës:
Diskutime dhe vendimmarrje për zbatimin e nenit 46, pika 4 të Statutit të PD.
Diskutime, qëndrime dhe vendimmarrje mbi situatën e krijuar në Partinë Demokratike, veçanërisht pas zgjedhjeve të 14 Maj 2023.
Më herët, gazetarja e ABC News, Erneta Shevroja raporton se mbledhja do të zhvillohet online dhe do të diskutohet për postin e kreut të kësaj force politike.
“Mbledhja do të zhvillohet online. Në Kryesinë e Kuvendit kanë ardhur dy deputetë, Xhelal Mzziu dhe Bledion Nallbati, të cilët do të jenë së bashku me Gazment Bardhin në këtë mbledhje. Është një mbledhje e cila është fokusuar totalisht te posti i kryetarit të PD, ndërkohqë që zhvillohet edhe në kuadër të një përplasjeje të vazhdueshme mes dy grupeve. Ditën e sotme, ky grup do të tentojë që të ketë një pjesëmarrje më të lartë të anëtarëve të Këshillit Kombëtar. Sa i përket rendit të ditës, anëtarët e Këshillit Kombëtar do të diskutojnë dhe do të marrin vendime për aktet që ka bërë PD, grupi Basha për rizgjedhjen e tij“, raportoi gazetarja Shevroja.
