Ashtu si një pjesë e madhe e futbollistëve nga Europa, edhe Jordan Henderson vendosi këtë verë të largohej nga Liverpooli për t’u transferuar në Arabinë Saudite tek skuadra e Al-Etiffaq. Ish-kapiteni i The Reds firmosi një kontratë mjaft fitimprurëse nga e cila do të arkëtojë plot 700.000 paund në javë.
Në lidhje me transferimin e 33-vjeçarit në Lindjen e Mesme foli për herë të parë trajneri Jurgen Klopp teksa gjermani shprehet se nuk e priste një lëvizje të tillë nga Henderson duke qenë se bëhej fjalë për një lojtar që ishte pjesë e Liverpool prej tetë vitesh.
“Sigurisht që u surprizova shumë nga një lëvizje e tillë. Henderson ishte pjesë e Liverpool prej tetë vitesh, ai e dinte shumë mirë se të gjithë ne në klub kërkonim që të qëndronte. Por, nëse lojtari dëshiron të largohet atëherë nuk mund të ndërtojmë një mur dhe t’i bllokojmë rrugën. Henderson do të na mungojë shumë, ashtu siç edhe atij do t’i mungojë shumë Liverpooli”, u shpreh Klopp.
