Instituti “Robert Koch”, i cili është përgjegjës për kontrollimin dhe parandalimin e sëmundjeve në Gjermani, ka konfirmuar të hënën se janë regjistruar 86 vdekje dhe mbi 4 mijë infektime të reja me koronavirus në këtë shtet.
Kështu, numri i personave të infektuar ka shkuar në 22,672 nga 18,610 sa ishte të dielën. Gjithashtu numri i vdekjeve është rritur nga 55 raste fatale në 86, shkruan “The Guardian”.
Gjermania është një ndër shtetet evropiane me numrin më të lartë të personave të infektuar me koronavirus, por befasisht me një ndër përqindjet më të vogla të vdekjeve në krahasim me infektimet dhe numrin e popullsisë. Gjermania tashmë i ka mbyllur shkollat, kinematë dhe teatrot si dhe i ka kufizuar tubimet publike.
