Sot mbushen njëzetenjë vjet nga fillimi i bombardimeve të NATO-s, për t’i dhënë fund fushatës së spastrimit etnik të Serbisë kundër shqiptarëve të Kosovës.
Bombardimet pasuan disa përpjekje për të siguruar një marrëveshje paqësore, e cila u refuzua nga Serbia.
Misioni i NATO-s synon të parandalojë sulmet e përgjakshme ndaj civilëve në Kosovë, u shpreh në atë kohë presidenti i Shteteve të Bashkuara, Bill Clinton.
Bombardimet nga ajri kundër caqeve të ushtrisë jugosllave zgjatën 78 ditë.
Në terren, forcat serbe kishin kryer sulme hakmarrëse kundër shqiptarëve, të cilat rezultuan me mbi 10,000 njerëz të vrarë, mbi 800,000 të përndjekur dhe rreth 5,000 të zhdukur.
Më 10 qershor të vitit 1999, NATO-ja nënshkroi marrëveshje me ushtrinë jugosllave për tërheqjen e saj të plotë nga Kosova.
Dy ditë më vonë, trupat paqeruajtëse të KFOR-it hynë në Kosovë, duke i dhënë fund luftës dhe sundimit të Beogradit.
