Will Smith më në fund ka thyer heshtjen për ndarjen nga gruaja Jada Pinkett Smith, disa ditë pasi ajo bëri deklaratën tronditëse se martesa e tyre përfundoi në vitin 2016.
Pinkett Smith është aktualisht duke promovuar librin e saj me kujtime, “Worthy”, dhe ka ndarë disa deklarata bombastike së fundmi – duke përfshirë faktin se dyshja nuk kanë jetuar së bashku për vite me rradhë.
Në një email për New York Times, Will Smith ka pranuar se intervistat e saj të fundit “e zgjuan atë” dhe e bënë të kuptojë faktin që ajo është “më elastike, e zgjuar dhe e dhembshur sesa [ai] kishte kuptuar”. Ai gjithashtu pranoi se ishte fajtor për një “verbëri emocionale” ndaj “nuancave të fshehura” të saj.
“Kur ke qenë me dikë për më shumë se gjysmën e jetës tënde, shfaqet një lloj verbërie emocionale dhe mund ta humbësh shumë lehtë ndjeshmërinë ndaj nuancave të fshehura dhe bukurive të tyre delikate.” – tha ai.
Çifti u martua në vitin 1997 dhe që atëherë janë parë si një nga çiftet më të forta në historinë e Hollywood-it; me dy fëmijë, Jaden, 25 vjeç dhe Willow, 22.
Fjalët e Will Smith vijnë disa ditë pasi gruaja e tij shokoi fansat kur zbuloi se ishin ndarë fshehurazi në vitin 2016. E pyetur se pse çifti e kishte mbajtur të fshehtë ndarjen, Pinkett Smith tha se thjesht nuk ishte gati ta bënte publike. Plus, ata “ende po përpiqeshin të kuptonin, mes tyre, se si të funksiononin në partneritet.”
Jada shtoi se ata e duan shumë njëri-tjetrin dhe se do ta gjejnë atë që funksionon për ta. Ajo sqaroi se janë të divorcuar, thjesht jo me dokumente, megjithatë bëjnë jetë të ndara./E.Ç
