Politikani i majtë Ilir Meta, është shfaqur këtë të martë në një konferencë për mediat nga selia e Partisë së Lirisë në Tiranë, ku ka denoncuar zhvillimet e fundit politike në vend dhe ato që ai i quan plane korruptive të qeverisë socialiste.
“Ne jemi vendi me probleme më serioze me korrupsionin në Evropë. Pranë nesh, kemin një shembull shumë pozitiv, Kosovën, e cila renditet e para në rajon për luftën kundër korrupsionit. Ajo renditet e 58-ta në Evropë, më shumë se 30 vende mbi Shqipërinë.
Ju e shikoni, edhe nga zhvillimet e fundit, Parlamenti është kapur prej fyti nga kryeministri, një zyrë e qeverisë që miraton ligje me porosi vetëm për të vjedhur. Është dëshmi e qeverisë për të mos dhënë llogari në Parlament”, u shpreh politikani Ilir Meta.
Kjo konferencë e tij vjen pas aludimeve në media nga analistë të caktuar, se kryetari i Partisë së Lirisë ishte larguar nga Shqipëria, menjëherë pas akuzave zyrtare të Prokurorisë së Posaçme ndaj ish-kryeministrit Sali Berisha.
Ish-presidenti i Shqipërisë dhe kryetari i Partisë së Lirisë, Ilir Meta është thirrur muaj më parë për të dëshmuar në Prokurorinë e Posaçme (SPAK) dhe është pyetur për disa orë. Hetimet, sipas atyre që kanë rrjedhur në media, lidhen me një lobim jashtë vendit dhe çështjen ÇEZ-DIA./ S.M
