Miliona raste kanceri diagnostikohen globalisht çdo vit dhe megjithatë trajtimet e zakonshme si kimioterapia dhe radioterapia që përdoren për të synuar qelizat kancerogjene kanë efekte të rënda anësore.
Tani, studiuesit nga Universiteti Duke kanë përshkruar një qasje që ata thonë se është më pak toksike sesa terapitë aktuale.
Ata publikuan gjetjet e tyre në revistën Immunity.
“Rezultatet janë shumë premtuese,” tha Jose Conejo-Garcia, një profesor i imunologjisë në Universitetin Duke.
Studimi u fokusua në një lloj të veçantë të antitrupave të quajtur dimerike IgA (digA), një nga format e imunoglobulinës A, antitrupi më i zakonshëm që mund të gjendet në membranat mukoze, si në zorrë.
Ky antitrup mund të përdoret për të synuar mutacionet në qelizat e kancerit.
Në këtë rast, studiuesit synuan një mutacion KRAS G12D.
Normalisht, gjeni KRAS ndihmon në kontrollin e rritjes së qelizave, por kur mutohet, ai ngec në pozicionin “on”, duke bërë që qelizat të rriten dhe ndahen në mënyrë të pakontrolluar.
Kjo çon në zhvillimin e kancerit sepse qelizat vazhdojnë të shumohen kur nuk duhet. Mutacionet KRAS janë të pranishme në shumë lloje kanceresh dhe e bën kancerin më agresiv dhe më të vështirë për t’u trajtuar.
dIgA lidhet me proteinat e mutuara për t’i nxjerrë ato nga qeliza në një proces të quajtur transcitozë. Kjo është kur një qelizë merr diçka nga jashtë, e bart atë përmes qelizës dhe më pas e lëshon atë në anën tjetër.
“Kjo është një mënyrë e re për të synuar qelizat tumorale duke përdorur një antitrup që është jashtëzakonisht specifik për mutacionet ” tha Conejo-Garcia në një deklaratë.
“Duke i neutralizuar ato dhe duke u siguruar që këto molekula që nxisin tumorin të dëbohen jashtë qelizës, ne mund të ndalojmë rritjen e tumorit.”
Kur u testua te minjtë me kancer të mushkërive dhe zorrës së trashë, antitrupi specifik i KRAS G12D ishte më efektiv në reduktimin e tumoreve sesa trajtimet aktuale./I.S
