Këshilli i Sigurimit në Nju Jork ka kërkuar “pauza të zgjeruara humanitare” për Rripin e Gazës. Pas debatesh të gjata instanca më e rëndësishme e OKB votoi me një shumicë të qartë të 12 nga 15 vende anëtare për rezolutën e paraqitur nga Malta. SHBA, Britania e Madhe dhe Rusia abstenuan. Kjo është rezoluta e parë e Këshillit të Sigurimit në konfliktin që shpërtheu pas sulmit të pashembullt të organizatës terroriste të Hamasit më 7 tetor.
Në tekstin e rezolutës kërkohen “Pauza humanitare për një numër të mjaftueshëm ditësh”, me qëllim që të sillen ndihma humanitare në zonën palestineze. Po ashtu shprehet “shqetësimi i thellë për gjendjen humanitare në Rripin e Gazës dhe pasojat e rënda për popullsinë civile, veçanërisht efektet joproporcionale për fëmijët”.
Të gjitha palëve u bëhet thirrje për respektimin e së drejtës ndërkombëtare. Po ashtu refuzohet “një zhvendosje e detyruar e popullsisë civile”, shërbimet e nevojshme jetësore nuk duhet t’u refuzohen civilëve në Gaza. Po ashtu Hamasit militant islamist dhe “grupeve të tjera” u bëhet thirrje të lirojnë menjëherë të gjitha pengjet. Hamasi kategorizohet nga SHBA, BE, Gjermania e vende të tjera si organizatë terroriste. Izraeli nuk përmendet shprehimisht në rezolutë. Rezolutat e OKB-së janë të detyrueshme nga ana e së drejtës ndërkombëtare.
Ndërkohë për herë të parë që nga fillimi i luftës kundër organizatës terroriste të Hamasit ushtria izraelite sipas të dhënave në media u ka bërë thirrje banorëve edhe në pjesën jugore të Rripit të Gazës që të largohen nga vendbanimet e tyre në vende të sigurta. Radioja e ushtrisë dhe portali ynet raportuan, se në pjesën lindore të qytetiti Khan Juni janë hedhur fletëpalosje në gjuhën arabe. Popullsia duhet të vendoset në siguri, ushtria nuk dëshiron që civilët të dëmtohen, thuhet aty. Qytetarët duhet të largohen në zonën e njohur si më të sigurtë, shkruan portali ynet. Sipas të dhënave të OKb-së deri tani janë larguar nga luftimet 2,2 milionë banorë të zonës palestineze nga luftimet./e.t
