Edhe Petrela ka tashmë një Qendër Rinore, e cila do të shërbejë për të gjithë zonën. Teksa mori pjesë në inaugurimin e saj, Kryetari i Bashkisë Tiranë, Erion Veliaj theksoi se ky projekt është një tjetër dëshmi se Bashkia po investon njësoj si në qendër ashtu edhe në periferi.
“Petrela është kthyer në një laborator urban të Tiranës, ku përzjehen dy realitete: realiteti rural dhe realiteti i zonave rezidenciale. Këtu takohet fiks fshati me qytetin, ndaj jam krenar që një nga nishanet e Vitit të Rinisë, ta kishim këtu në Petrelë, për të dhënë një mesazh se po investojmë edhe në periferi me të njëjtën cilësi në infrastructure”
Veliaj shtoi se kjo qendër rinore do t’i shërbejë edhe komunitetit të zonës.
“Ne duhet ta kthejmë këtë hapësirë në një zyrë komunitare, ku mblidhen kryepleqtë, ku mblidhen senatorët e rinisë, ku mblidhen aktivistët e shoqërisë civile, ku mblidhen artistët. Njësoj siç kemi krijuar edhe një hapësirë tjetër për ekspozita dhe art kontemporan në Petrelë. Ndaj, pasioni apo dëshira ime do ishte që kjo qendër të gëlojë, të ziejë nga jeta. Si për rastet sfiduese me emergjencat natyrore, si për raste gëzimi”
Ky ambient do të shërbejë edhe si një Qendër Multifunksionale në Petrelë dhe do u japë të rinjve të lexojnë dhe studiojnë në kushte bashkëkohore./O.S
