Denis Protsenko, mjeku që javën e kaluar i bëri presidentit rus, Vladimir Putin, një turne në spitalin kryesor të Moskës, kushtuar pacientëve me koronavirus, tha se ai është diagnostifikuar me Covid-19, por po ndjehet mirë.
“Unë kam rezultuar pozitiv,”-shkroi Protsenko, drejtori i Spitalit Nr. 40, në Facebook. “Por ndihem mirë.”-theksoi ai, raporton “Bloomberg”.
Putini, i cili nuk kishte veshur ndonjë mjet mbrojtës kur u takua dhe shtrëngoi duart me Protsenko më 24 mars, është testuar rregullisht dhe është mirë, tha të martën zëdhënësi i Kremlinit Dmitry Peskov. Protsenko javën e kaluar paralajmëroi presidentin se Rusia duhet të parandalojë sëmundjen që të mos përhapet si ajo në Itali.
“Jam izoluar në zyrën time, ku gjithçka është në vend për punën në distancë, menaxhim dhe konsultime telemjekësore”, -shkroi Protsenko. “Unë mendoj se imuniteti që kam ndërtuar gjatë këtij muaji po bën punën e tij.”-theksoi mjeku rus.
Protsenko, 44 vjeç, ka qenë fytyra e betejës së Moskës me koronavirusin për shumë rusë falë postimeve të tij të rregullta në mediat sociale që i kushtojnë vëmendje përhapjes së brendshme të pandemisë. Në javën që nga takimi i tij me Putinin, Moska ndodhet në bllokim.
Rusia të martën raportoi një rritje prej 27% të infeksioneve koronavirus gjatë natës, duke e çuar totalin në 2.337./Fjala.al/
