“Ndërtimi dhe shërbimet, motorë të ekonomisë”
Viti që lamë pas u mbyll me një përmirësim të ndjeshëm të besimit në ekonomi, duke qëndruar 11.9 pikë përqindje mbi mesataren afatgjatë.
Ky përmirësim sipas Bankës së Shqipërisë u ndikua nga rritja e besimit në sektorët e ndërtimit, shërbimeve dhe më pak nga ai i industrisë.
Blerjet në fundvit kanë dhënë kontributin e tyre në sektorin e shërbimeve ku përfshihen supermarketet, baret e restorantet, të cilat pësuan një rritje me 2.6 pikë përqindje.
Ndërsa në perfomancë të mirë vijon ndërtimi, ky tregues u rrit me 9.1 pikë përqindje në Dhjetor. Sektori i tregtisë, si edhe besimi konsumator regjistruan vlera thuajse të njëjta me një muaj më parë.
Përgjatë gjysmës së dytë të vitit, tregtia rezulton pesimiste duke vijuar rënien në Dhjetor me 0.3 pikë përqindje. Çmimet e larta të cilat kanë ulur konsumin, po injektojnë më pak të ardhura për bizneset.
Nga ana tjetër sipas Bankës së Shqipërisë e gjithë ekonomia shqiptare ka shfaqur pesimizëm për të ardhmen sa i takon pritshmërive për inflacionin, duke nënkuptuar që çmimet do të vijojnë tendencën rritëse, por ndërkohë edhe kërkesat për fuqi punëtore mbeten ende të larta./O.S
